Verndum strenginn - verndum Seyðisfjörð - umsögn við tillögu að breytingum á fjarskiptalögum

Kæru vinir og baráttufélagar

Nú leitum við til ykkar á enn einni ögurstund í baráttunni fyrir vernd Seyðisfjarðar. Frumvarp til breytinga á fjarskiptalögum er nú í samráðsgátt stjórnvalda. Frestur til  athugasemda við frumvarpið rennur út 8. október. Breytingar, sem lagðar eru til á 86. grein fjarskiptalaga eru að mörgu leyti góðar, fyrir utan undanþáguheimild sem ráðherra er veitt samkvæmt henni. Við höfum miklar áhyggjur af því að hún hafi þann tilgang einan að koma sjókvíaeldi Kaldvíkur fyrir á hafnarsvæði Seyðisfjarðar. Í briminu við suðurströnd Íslands hentar ekki að setja sjókvíar og undanþágan því ekki notuð við strengina Íris og Danice.  

Það vekur þannig undrun og er óskiljanlegt að í frumvarpinu sé gert ráð fyrir undanþáguheimild á sama tíma og ríkisstjórnin hefur lagt áherslu á að efla netöryggi.

Þeir sem vilja tryggja netöryggi Íslands og Færeyja, og jafnframt standa gegn því að fyrirtækið Kaldvík fái afslátt þegar koma þarf sjókvíum í Seyðisfjörð, geta skilað inn athugasemdum til miðnættis þann 8. október 2025.

Hér fyrir neðan fylgir tillaga að umsögn við frumvarpið. Fólk er hvatt til að nýta hana, eða breyta og bæta að eigin vild áður en umsögn er send inn.

Með sameiginlegu átaki getum við haft raunveruleg áhrif á málið. Neðst í póstinum höfum við einnig tekið saman þessa 86.grein fyrir þá sem vilja kynna sér hana í heild. 

Slóðin er þessi   : https://island.is/samradsgatt/mal/4067 . Til hægri á síðunni er hnappur „Senda umsögn“. 

Við treystum því að landsmenn standi áfram saman um vernd almannahagsmuna og Seyðisfjarðar.

Sendum inn umsögn og biðjum fólkið í kringum okkur að gera það sama – það tekur aðeins 3 mínútur en getur skipt sköpum.

Umsögnin er hér í pdf formi í hnappnum að neðan og eins að finna undir kaflanum “athugasemdir” hér á heimasíðunni.